Ils trajects da viafier Alvra/Bernina tranter Tusaun e Tiraun èn exempels excellents e tecnicamain innovativs per l'avertura da la cuntrada autalpina e tutgan tar las viafiers a binari stretg las pli spectacularas dal mund.

La basa da Alvra / Bernina è la viafier retica. La viafier da l'Alvra è vegnida averta l'onn 1903, la viafier dal Bernina l'onn 1910. La viafier da l'Alvra valeva gia dal temp da sia realisaziun sco capodovra. En il territori alpin è la viafier dal Bernina (San Murezzan - Tiraun) daventada il prototip per bleras viafiers interregiunalas projectadas e per intginas viafiers construidas. Oz è ella unica sin tut il mund: Tar quest traject sa tracti da la transversala da las alps la pli auta da l'Europa e d'ina da las viafiers d'adesiun las pli stippas dal mund.